الصورة هيه هيه
الصورة هيه هيه
نفس الجموع
نفس الدموع
نفس الموضوع
بعد مرور عام كامل
خرج الشعب يقول من تاني
أين سجاني؟
أين اللي في الذل والقهر رماني؟
أين من سلب أوطاني؟
أين من قتل شباني؟
رد صوت ضعيف
نعم ضعيف
سمعته الأذن وكأنه حفيف
يقول إنهم يُحاكمون
هدرت الجموع
بصوت عال ومسموع
مازالوا يحاكمون !!!!!!!
آه ياني
الصورة هيه هيه
نفس الجموع
نفس الدموع
نفس الموضوع
جلس المجلس
قال الرئيس
لجنة لتقصي الحقائق
قالها في دقائق
لجنة تاني
آه ياني
هل الموضوع تنقصه الأدلة ام الإرادة ؟
أنا رأيي يُضرب المخلوع بالبيادة
ولو مامتش يبقي فيه إعادة
ولكن لكونه كبير السن طاعن
يبقي في صندوق زجاج
ومن خلفه يضرب أهل الشهداء
هيموت طبعا من الخضة
ولو مامتش يسجن مدي الحياة
في سجن عادي
زي ما كان مخلي بلادي
وبيسجن إخواني وأولادي
ونخلص بقي من الحدوته ديه
خلينا نبني بقي
أخشي بعد مرور شهور كمان
ترجع نفس الجموع تتكلم
في نفس الموضوع
عن كيف نحاكم الرئيس المخلوع ؟
ليست هناك تعليقات:
Write التعليقات