وانفض السيرك

وانفض السيرك
في داخل مملكة البراغيت سارت فيه إشاعة مفادها بإختصار إن البراغيت لها حق التصويت ولها حقوق دستورية ولها حقوق أي أقلية بل أكثرية ولها ولها ... يعني ببساطة من حقها تعيش عيشة ديمقراطية
البراغيت صدقت ومن فرحتها بالدميقراطية اتعلقت
خرج برغوت نافش ريشه ( وكل برغوت علي قد ريشه ) وقال أنا لازم أقول الحقيقة علي الأقل من وجهة نظري وعمل عملة غريبة أصدر بيان وجريدة يوعي فيها - علي كلامه - البراغيت ويصرخ وينادي ويدعي علي العفاريت
وفي الهوجة خرجت براغيت كتيرة تعمل نفس العملة الخطيرة
وبرغوت عبقري قال لازم نعمل إذاعة وبرامج ونولعها  ونقول اللي إحنا عايزينه ونطالب بالمطالب الدستورية
وفعلا أصبحت مملكة البراغيت تعج بالنشاط بصحيح وباستعباط كل واحد بقي له قناة يقول ويصول ويجول ولا في الأحلام
وساعة الجد ومن جد وجد ومن زرع حصد
زعق برغوت وقال ما ينفعش
في الوقت ده كان فيه صرصار معدي راح صارخ في البرغوت وقاله بنقول إيه وعشان إيه
بس يا.... وشخط وزعق ورعد وبرق
وبسرعة البراغيت جريت وانفض السيرك